नशा देऊन चोरी करणारी महिला आरोपी जेरबंद ; रोख रक्कम व दागिने जप्त
नांदेड : दि. 27 एप्रिल
दक्षिण मध्य रेल्वेच्या नांदेड विभागातील रेल्वे सुरक्षा दलाच्या CIB/नांदेड व GRP/नांदेड यांनी संयुक्त कारवाई करत ऑपरेशन यात्री सुरक्षा अंतर्गत फरार असलेल्या महिला नशा देऊन चोरी करणाऱ्या आरोपीला 26 एप्रिल 2026 रोजी सेकंदराबाद रेल्वे स्थानकावर अटक केली. तिच्याकडून ₹1,40,860/- इतकी रोख रक्कम, सोन्याचे दागिने, मोबाईल फोन तसेच इतर वस्तू जप्त करण्यात आल्या.
सदर प्रकरणात GRP छत्रपती संभाजीनगर (CPSN) येथे गुन्हा क्रमांक 128/2026 अंतर्गत BNS-2023 च्या कलम 123 व 305(C) नुसार गुन्हा नोंद करण्यात आला होता. हा प्रकार 05/06 एप्रिल 2026 च्या दरम्यान ट्रेन क्रमांक 17205 एक्सप्रेसच्या महिला डब्यात CPSN–परभणी (PBN) दरम्यान घडला होता. या घटनेत एका महिला प्रवाशाला नशा देऊन तिच्याकडील अंदाजे 50 ग्रॅम सोन्याचे दागिने (मूल्य सुमारे ₹2.5 लाख) चोरी करण्यात आले होते.
सदर माहिती मिळताच CIB/RPF नांदेड पथकाने तपास सुरू करून पीडित प्रवाशाकडून आरोपीच्या दिसण्याबाबत माहिती घेतली. त्यानंतर संबंधित गाडीतील CCTV फुटेज तपासण्यात आले, ज्यामध्ये एक संशयित महिला आढळून आली. पीडित प्रवाशाला तिचे छायाचित्र दाखविण्यात आले असता तिने त्या महिलेची ओळख पटवली.
यानंतर आरोपीचा शोध घेण्यासाठी तिचे छायाचित्र भुसावळ, पुणे, मुंबई, नांदेड, सोलापूर आदी जवळच्या रेल्वे विभागांना पाठविण्यात आले तसेच संबंधित GRP ठाण्यांशी समन्वय साधण्यात आला. 25 एप्रिल 2026 रोजी आरोपीचा मोबाईल लोकेशन सेकंदराबाद येथे आढळून आला. तत्काळ ही माहिती RPF सेकंदराबाद पोस्ट यांना देण्यात आली.
त्या दिवशीच सायंकाळी RPF सेकंदराबाद यांनी संशयित महिलेला ताब्यात घेतले व GRP सेकंदराबाद कडे सुपूर्द केले. त्यानंतर CIB/RPF नांदेड व GRP नांदेड पथक सेकंदराबाद येथे पोहोचून आवश्यक कार्यवाही पूर्ण करून आरोपीला नांदेड येथे आणले व पुढील तपासासाठी GRP LCB छत्रपती संभाजीनगर (CPSN) यांच्या ताब्यात दिले.
आरोपीकडून खालील वस्तू जप्त करण्यात आल्या:
• रोख रक्कम: ₹1,40,860/-
• मोबाईल फोन: नोकिया (ब्लॅक अँड व्हाईट)
• सोने/पिवळ्या रंगाचे कानातील व गळ्यातील दागिने (मूल्य निश्चित करणे बाकी)
• आधार कार्ड, गोळ्या व औषधे इत्यादी
सदर आरोपीस 27 एप्रिल 2026 रोजी माननीय JMFC न्यायालय, छत्रपती संभाजीनगर येथे हजर करण्यात येणार असून चोरीस गेलेल्या प्रवाशांच्या मालमत्तेचा पुढील तपास व जप्तीसाठी पोलीस कोठडी (PCR) मागणी करण्यात येणार आहे.
या यशस्वी कारवाईमुळे रेल्वे प्रवाशांच्या सुरक्षेसाठी RPF आणि GRP यांच्यातील प्रभावी समन्वय अधोरेखित झाला असून रेल्वे प्रशासन प्रवाशांच्या सुरक्षिततेसाठी कटिबद्ध असल्याचे पुन्हा एकदा सिद्ध झाले आहे.
