नांदेड – वट पौर्णिमानिमित्त वटवृक्षाला प्रदक्षिणा सुरू असतांना हजारो मधमाशांनी अचानकपणे महिलांवर हल्ला चढविला. यात रस्त्यावरून जाणारी पुरुष मंडळीही कचाट्यात सपडली. या हल्ल्यात १ महिला व १ पुरूष गंभीर जखमी झाला. तर अनेक महिला किरकोळ जखमी झाल्या. ही घटना नांदेड जिल्ह्यात माहूर शहरात दि. १० रोजी दुपारी ३ वाजता वार्ड क्रमांक ५ मधील हनुमान मंदिराजवळ घडली.
वट पौर्णिमेनिमित्त दि. १० जून रोजी सकाळपासून शहरातील हनुमान मंदिर वटवृक्षाजवळ महिलांची पुजापाठ सुरू होते. ११.२५ मिनिटांना मुहूर्त असल्याने महिलांनी तोबा गर्दी केली होती. अगरबत्ती धुप लावून वटवृक्षाला प्रदक्षिणा सुरू होत्या. दुपारी ३ च्या सुमारास अगरबत्ती, धूपचा धुर जास्त झाल्याने शेजारच्या झाडावरील मधमाशांनी अचानक येथील महिला आणि रस्त्यावरून जाणाऱ्या अनेकांवर हल्ला चढविला. यामध्ये चंदा दिलीप पांडे वय ६५ रा. ब्राह्मण गल्ली आणि विलास मोतीराम पवार ४५ रा. बंजारा तांडा माहूर हे मधमाशांच्या हल्ल्यात सापडले मधमाशांच्या चावा मुळे दोघेही बेशुद्ध पडले तर अनेक महिला मधमाशांनी चावा घेतल्याने तेथून पळ काढला. तर काही नागरिकांनी हिंमत दाखवून दोन्ही जखमीवर ग्रामीण रुग्णालयात दाखल केले.
